1Cor 2 | MED | STEP | Angmᵾn, na unt enim kᵾn ur ni kᵾn, enim Got nga ik kupa mo ropa titim mbᵾ, omp kundᵾp nit. Na pilpa kungᵾndi ronduⱡ mat pilip kᵾn, enim uⱡ mat, kunt kan etᵾp timp pilip ni nᵾndᵾt mon!

1 Corinthians 2

Pol Ndi, Kraist Nde Peta Ila Pitim Uⱡ Ei Nga Ninditim

1 Angmᵾn, na unt enim kᵾn ur ni kᵾn, enim Got nga ik kupa mo ropa titim mbᵾ, omp kundᵾp nit. Na pilpa kungᵾndi ronduⱡ mat pilip kᵾn, enim uⱡ mat, kunt kan etᵾp timp pilip ni nᵾndᵾt mon! 2 Na enim kᵾn omp mur ni kᵾn, na nga numan ila uⱡ elpa elpa mbᵾ tᵾp apra ndup, Jisas Kraist kᵾn, elim nga nde peta ila kurum uⱡ ei nga mint pilip mur. 3 Na enim kᵾn omp mur ni kᵾn, na nga ronduⱡ ti, pi nᵾpᵾtᵾm, wote na nga kᵾmp ki mbᵾ, purpur roⱡnga mundmong it. 4 Na nga ik mong nᵾmp ngump it kᵾⱡ mᵾi kona wamp nga pilpa kungᵾndi ronduⱡ mat pilip kᵾn, enim kunt kan etᵾp, ik mat ni nᵾndᵾt mon. Na nit ik nimbᵾ, Muⱡnga Wingti nga ronduⱡ ei, tᵾp pena ila pindᵾt. 5 Na it uⱡ, ei nambuⱡ emel, enim nga mondpa pili ei, wamp nga pilpa kungᵾndi ronduⱡ pᵾtmᵾn pol ila, tᵾk iteing nᵾmp iti nᵾtᵾt mon! Wote, Got nga ronduⱡ ei ndi, enim nga mondpa pili ei, etpa oⱡa tangga nᵾmp it.

Muⱡnga Wingti Ei Ndi, Tᵾn Got Nga Pilpa Kungᵾndi Ei Ngorum

6 Ei nga, ronduⱡ puⱡnga mormin wamp mbᵾ, pilpa kungᵾndi ronduⱡ ei nga nombuⱡa rung ik mbᵾ, kundᵾp nᵾt. Wote, pilpa kungᵾndi ronduⱡ ei, ya mᵾi kona wamp nga pilpa kungᵾndi ti, muna wamp rᵾp etmin wu nuim mbᵾ nga pilpa kungᵾndi nga ronduⱡ mana ndurum ti mon. 7 Na pilpa kungᵾndi ik ronduⱡ tep nᵾt mbᵾ, Got nga pilpa kungᵾndi ei mᵾi kona wamp mbᵾ kᵾn, mo ropa pinditim ik mbᵾ, ekit tᵾp nᵾt. Pilpa kungᵾndi ronduⱡ ei, tᵾn nga nimba muⱡ mᵾi raⱡ mim iti nᵾti kᵾn, elim nga uⱡ eng nui ila kunda muⱡᵾmin nimba mo ropa titim. 8 Mᵾi kona rup etmin wu nuim mbᵾ nga ti ndi, pilpa kungᵾndi numan ei pilik ti natᵾtᵾng. Pilpa kungᵾndi ei, pilik kun elingina ndam, uⱡ eng nui ila morum wu Nuim ei, tᵾk nde peta ila rui narᵾⱡina. 9 Wote, uⱡ ei mel petᵾm ei nga, Buk Wingti ei ndi, nimba mel,

“Mel ti wamp ti nga mong ei ndi, kᵾni nᵾkᵾndrᵾm, muna kum ei ndi, pili nᵾpᵾtᵾm, muna wamp nga numan ei ndi, etmba nᵾk pili napᵾtᵾng uⱡ nimbᵾ, Got ndi, elim numan ngurmin wamp mbᵾ nga, tᵾpa kun etpa tinditim,” nᵾtᵾm.
10 Wote, Got elim nga Muⱡnga ei ndi, uⱡ mo ropa tetᵾm kᵾⱡ, tᵾn tᵾpa ora ndurum. Ei nambuⱡ emel, Muⱡnga ei ndi, uⱡ mo ropa petᵾm mbᵾ kep, Got nga uⱡ wote etmba numan ila, mo ropa petᵾm mbᵾ, kandpa pora ndurum. 11 Wamp ti nga numan rukrᵾng orunga, petᵾm uⱡ ei, wamp elim nga muⱡnga ei ndi, mendpᵾⱡ pᵾtᵾm. Ei mel ku, Got elim nga Muⱡnga ei ndi, Got kandpa pilpa etᵾm. 12 Tᵾn mᵾi kona ei nga muⱡnga ei, ti nᵾtᵾtmᵾn mon. Wote, tᵾn Got nga ngumba mundrum Muⱡnga ei ndi, tᵾn etpa piral nduⱡnga, Got ndi, tᵾn memp mel ngorum mbᵾ, kandᵾp mbi ndupᵾn etmᵾn. 13 Ei nga, tᵾn wamp nga numan pilpa kungᵾndi ila mbo ronduⱡina, ik ni nanᵾnmᵾn. Wote, Muⱡnga ei ndi, ik kupa mbᵾ mbo ronduⱡnga kᵾn, Muⱡnga tek mormin wamp mbᵾ kᵾn, nᵾmp piral ndunmin. 14 Wote, Muⱡnga tepa muⱡi nambrᵾm wamp ei, Got nga Muⱡnga ei ndi, memp kai ngorum mbᵾ, kapⱡa pilpa ti natᵾmba. Wamp ei ndi, numan kai ngorum kᵾⱡ pilpa poⱡ ndui nandpa, numan kurpa mat nimba pᵾtᵾm. Ei nambuⱡ emel, Got nga numan ngorum uⱡ mbᵾ, Got nga Muⱡnga ei, tek molk, mint pilik mbi ndurmᵾn. 15 Muⱡnga tepa moⱡum wamp ei ndi, uⱡ mbᵾ pora, kᵾmp tᵾpa pilpa tᵾpa mendᵾmba. Wote, wamp wei ti ndi, wamp ei, kapⱡa kᵾmp ti natᵾmba. 16 Buk Wingti ei ndi, nimba mel,

“Wamp nam ti ndi, Nuim ei nga numan ei pᵾtᵾm? Wamp nam ti ndi, kapⱡa Nuim ei, ik mat man ngumba?” nᵾtᵾm.
Wote, Kraist nga numan pᵾtᵾm uⱡ mbᵾ, tᵾn ndi, pilpᵾn mbi ndurmᵾn.